Tripura MF Chanchin tawi

Tripura ram hi India hmarchhak-Assam, Mizoram leh Bangladesh hual chhunga awm, Sq Km 10,492 a zau, district pali chauh nei ni mah sela; mihring nuai sawmthum paruk lai awmna, vai leh tlang mite inchen pawlhna ram a ni. Tripura ramah hian kan Kohhran mi, Bunghmun lal Hrangvunga Sailo chu 1911-ah Phuldungsei-ah pemin Chanchin Tha meichher chhi luttu hmasa ber a ni. Kum 1918-ah Tripura pum huapin Jampui Presbytery a lo ding a. Kum 1938-ah New Zealand Baptist Mission- lo chhuakin ni 4th Dec,1938 ah TBCU an rawn din a, Presbyterian Kohhrante pawh inzawm khawm Kohhranah chuan 1944 khan an lut ve ta a ni.
       TBCU Association pakhat amite chuan Mizoram Synod zawm tumin 1974 khan Mizo Synod-ah dilna an thehlut a. Mizo Synod chuan a pawm sak lova. Mizoram atanga rawngbawla chhuk thla Presbyterian mi leh sate chuan harsatna an tawh lai a ni a. Mizo Synod auhthlak theihna remchang nia hriain Presbyterian Kohhran  chu 1975 khan an din ta a. Kum sawm zet a ral hnuin Mizoram Synod-in Tripura rama Presbyterian Kohhran chu a pawm ta a. Pastor pahnih pe-in Pastor bial thum leh Kohhran member 776 te chu ni 20th, July,1986 khan lawmlutin Synod Pastoral Ministry hnuaiah SEC-in a enkawl a. Kum 1988 Synod chuan Tripura rama rawngbawlna chu Synod Mission Board kutah a dah leh ta zawka, vawiin thlengin SMB hnuaiah chuan a la awm ta a ni. Rawngbawlna thang zelah 1990-ah Presbytery hawn a ni a, kum 2008 ah Presbytery pahnih a then a lo ni leh ta a, 2012 May khan Presbytery Pahnih hawn belh a ni leh a, tichuan Presbytery Pali a ni ta ni.